मौरिसस पठाइदिन्छु भन्दै १ लाख ९० हजार ठगी गर्ने व्यक्ति पक्राउ

काठमाडौं, २९ साउन । आकर्षक तलबको प्रलोभनमा पारेर वैदेशिक रोजगारीका लागि मौरिसस पठाइदिन्छु भन्दै रकम ठगी गरेको अभियोगमा प्रहरीले एक जनालाई पक्राउ गरेको छ।

पक्राउ पर्नेमा काठमाडौं महानगरपालिका–३ बस्ने तथा ताप्लेजुङको सिरीजंघा गाउँपालिका–७ घर भएका ३० वर्षीय सुमन भट्टराई रहेका छन्।

प्रहरीका अनुसार भट्टराईले मौरिसस पठाइदिने भन्दै २ जना पीडितबाट १ लाख ९० हजार रुपैयाँ लिएका थिए। रकम लिएपछि सम्पर्कविहीन भएको भन्दै पीडितहरूले प्रहरीमा उजुरी दिएका थिए।

उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरीले भट्टराईलाई काठमाडौं महानगरपालिका–२६ बाट बुधबार पक्राउ गरेको हो।

पक्राउ परेका भट्टराईलाई आवश्यक अनुसन्धान तथा कानुनी कारबाहीका लागि वैदेशिक रोजगार विभाग, ताहाचल काठमाडौं पठाइएको प्रहरीले जनाएको छ।