मौरिससदेखि यूएईसम्म पठाइदिन्छु भन्दै २४ लाख ३४ हजार ठगी, चार जना पक्राउ

काठमाडौं, आकर्षक तलबको प्रलोभन देखाउँदै मौरिसस, कम्बोडिया, रोमानिया र यूएई पठाइदिन्छु भन्दै चार जना पीडितबाट कुल २४ लाख ३४ हजार रुपैयाँ ठगी गरेको आरोपमा प्रहरीले चार जनालाई पक्राउ गरेको छ।

पक्राउ पर्नेमा मनोहर मुडभरी, अनिल मल्ल, कमला पौडेल सुनार र तुलसीराम ढुंगेल रहेका छन्। उनीहरूले क्रमशः ३ लाख ५० हजार, ८ लाख ८४ हजार, ६ लाख र ६ लाख रुपैयाँ लिएको उजुरी परेको प्रहरीले जनाएको छ।

पीडितहरूको उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरीले काठमाडौं र ललितपुरका विभिन्न स्थानबाट उनीहरूलाई पक्राउ गरेको हो।

पक्राउ परेकाहरूलाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।

वैदेशिक रोजगारीमा जानुअघि सम्बन्धित व्यक्ति तथा संस्थाको वैधानिकता र कागजात अनिवार्य जाँच गर्नुहोस्।