हुण्डी कारोबारमा संलग्न रहेको आरोपमा एक पक्राउ, १ अर्ब ८९ करोडभन्दा बढीको कारोबार खुलासा

काठमाडौं, हुण्डी कारोबारमा संलग्न रहेको आरोपमा धादिङ घर भई हाल काठमाडौंको नागार्जुन नगरपालिका–८ बस्ने ४९ वर्षीय राजेन्द्र प्रसाद रिजाल पक्राउ परेका छन्।

नेपाल प्रहरीको केन्द्रीय अनुसन्धान ब्यूरो (सीआईबी)बाट खटिएको टोलीले मंगलबार नागार्जुन नगरपालिका–८ स्थित राधाकृष्ण मन्दिर क्षेत्रबाट उनलाई पक्राउ गरेको हो।

प्रहरीका अनुसार प्रारम्भिक अनुसन्धानमा रिजालले अन्य व्यक्तिहरूसँगको मिलेमतोमा व्यक्तिगत बैंक खाता प्रयोग गरी १ अर्ब ८९ करोड ६५ लाख ३९ हजार ४ सय ५४ रुपैयाँ बराबरको रकम हुण्डीमार्फत कारोबार गरेको खुलेको छ।

घटनाबारे थप अनुसन्धान भइरहेको प्रहरीले जनाएको छ। कानुनविपरीत हुने हुण्डी कारोबार आर्थिक अपराधको रूपमा हेरिने भएकाले यसमा संलग्न अन्य व्यक्तिको भूमिकाबारे पनि अनुसन्धान जारी रहेको छ।