बेलायतदेखि युएईसम्म पठाइदिने भन्दै लाखौं ठगी, चार जना पक्राउ

काठमाडौं, आकर्षक तलबको प्रलोभन देखाउँदै बेलायत, फ्रान्स, ब्रुनाई र युएई पठाइदिने भन्दै लाखौं रुपैयाँ ठगी गरेको आरोपमा चार जनालाई प्रहरीले पक्राउ गरेको छ।

पक्राउ पर्नेमा पूजा शाही, दीपक साह, जय मंगल प्रसाद निसाद र मीना श्रेष्ठ खत्री रहेका छन्।

प्रहरीका अनुसार:

• पूजा शाहीले बेलायत पठाइदिने भन्दै १७ लाख रुपैयाँ,
• दीपक साहले फ्रान्स पठाइदिने भन्दै ५ लाख रुपैयाँ,
• जय मंगल प्रसाद निसादले ब्रुनाई पठाइदिने भन्दै ४ लाख ३८ हजार रुपैयाँ,
• मीना श्रेष्ठ खत्रीले युएई पठाइदिने भन्दै ६ लाख रुपैयाँ लिएर सम्पर्कविहीन भएका थिए।

पीडितहरूको उजुरीपछि काठमाडौं उपत्यका अपराध अनुसन्धान कार्यालय, टेकुको टोलीले उनीहरूलाई काठमाडौंका विभिन्न स्थानबाट पक्राउ गरेको हो।

प्रहरीले चारै जनालाई थप अनुसन्धान तथा कानुनी कारबाहीका लागि वैदेशिक रोजगार विभाग, ताहाचल पठाएको जनाएको छ।

वैदेशिक रोजगारीमा जानुअघि सम्बन्धित म्यानपावर कम्पनी, श्रम स्वीकृति र आधिकारिक प्रक्रिया अनिवार्य रूपमा जाँच गर्नुहोस्। आकर्षक तलब र छिटो भिसाको प्रलोभनमा परेर रकम नदिनुहोस्।