कम्बोडिया र यूएई पठाइदिने भन्दै लाखौं ठगी, दुई जना पक्राउ

काठमाडौं, वैदेशिक रोजगारीका नाममा आकर्षक तलबको प्रलोभन देखाएर लाखौं रुपैयाँ ठगी गर्ने दुई जनालाई प्रहरीले पक्राउ गरेको छ।

काठमाडौं उपत्यका अपराध अनुसन्धान कार्यालय, टेकुको टोलीले सुनसरी इटहरी उपमहानगरपालिका–१७ बस्ने, ओखलढुंगा लिखु गाउँपालिका–३ घर भएका २८ वर्षीय प्रदीप कुमार श्रेष्ठ र कपिलवस्तु शिवराज नगरपालिका–१ घर भएकी २४ वर्षीया कविता वेल्वासेलाई पक्राउ गरेको हो।

प्रहरीका अनुसार प्रदीपले “कम्बोडिया पठाइदिन्छु” भन्दै एक पीडितबाट ४ लाख रुपैयाँ र कविताले “यूएई पठाइदिन्छु” भन्दै अर्का एक पीडितबाट १ लाख ८० हजार रुपैयाँ लिई सम्पर्कविहीन भएका थिए।

पीडितहरूको उजुरीपछि अनुसन्धान अघि बढाएको प्रहरीले प्रदीपलाई काठमाडौं महानगरपालिका–३ बाट आइतबार र कवितालाई काठमाडौं महानगरपालिका–१२ बाट सोमबार पक्राउ गरेको जनाएको छ।

प्रहरीले वैदेशिक रोजगारीका लागि रकम बुझाउनुअघि सम्बन्धित म्यानपावर कम्पनी, वैदेशिक रोजगार विभागको स्वीकृति र कानुनी प्रक्रिया अनिवार्य रूपमा बुझ्न आग्रह गर्दै यस्ता प्रलोभनबाट सतर्क रहन सबैलाई अनुरोध गरेको छ।