ओलीको हस्ताक्षरसहित ६ लाख ६७ हजारलाई एउटै चिठी! एमालेको चुनावी ‘मास अपिल’ सुरु

काठमाडौँ। नेकपा एमालेले अध्यक्ष केपी शर्मा ओलीको हस्ताक्षरसहित ६ लाख ६७ हजारभन्दा बढी व्यक्तिलाई एउटै सन्देश लेखिएको चिठी पठाएको छ। यो चिठी पार्टीका संगठित सदस्य मात्र होइन, पहिले सदस्य रहेर हाल नवीकरण नगरेकासम्म पुगेको छ।

चिठी पाएको भन्दै धेरैले सामाजिक सञ्जालमा पोस्ट गर्न थालेपछि एमालेको यो अभियान सार्वजनिक रूपमा चर्चामा आएको हो। एकै किसिमको सन्देश, एउटै हस्ताक्षर र एउटै लक्ष्य—निर्वाचन केन्द्रित अपिल।

एमालेका अनुसार अध्यक्ष ओलीले फागुन २१ को सन्दर्भ उल्लेख गर्दै चिठीमा “निर्वाचनले देशलाई विनाशतर्फ धकेल्ने कि निर्माणको बाटोमा अघि बढाउने भन्ने हार–जितको फैसला गर्ने” उल्लेख गरेका छन्।

चिठीमा ओलीले देश निर्माणका लागि एमालेलाई बहुमत आवश्यक रहेको दाबीसमेत गरेका छन्। यसलाई आगामी निर्वाचनलाई लक्षित गर्दै गरिएको मास क्याम्पेनिङको रूपमा हेरिएको छ।

पार्टी स्रोतका अनुसार यस्तै सन्देशसहितको चिठी यसअघि नै केन्द्रीय सदस्यहरूलाई पनि पठाइसकिएको छ।