“देश भ्रमले होइन, श्रम र पसिनाले चल्छ” : अध्यक्ष साम्पाङको सन्देश

कर्णाली, सुर्खेत – श्रम संस्कृति पार्टीका अध्यक्ष हर्क साम्पाङले देशको विकास धेरै भाषण र भ्रमले होइन, इमानदार मेहनत र श्रमले मात्र सम्भव रहेको बताएका छन्।

शुक्रबार पार्टीको प्रदेशस्तरीय सङ्गठन विस्तार कार्यक्रममा बोल्दै अध्यक्ष साम्पाङले भने, “मैले सत्य लुकाएर बोल्न जानेको छैन। बेतिथि र भ्रष्टाचारविरुद्ध १५ वर्षदेखि एक्लै लड्दै आएको छु। देशलाई अघि बढाउन माटोप्रतिको प्रेम र पसिना आवश्यक छ।”

उनले जोड दिए कि देश बचाउन र निर्माण गर्न श्रम अनिवार्य छ। पार्टी, धर्म र जातको नाममा हुने विवाद अन्त्य गरी साना कामबाटै महान संस्कारको आरम्भ गर्नुपर्छ। उनले सबै नागरिकलाई श्रमदाताको दृष्टिले अगाडि बढ्न प्रेरित गर्दै भने, “काम नगर्ने प्रवृत्तिकै कारण मुलुक पछाडि परेको छ। देशको समृद्धि श्रमदाताबाटै सम्भव छ।”

अध्यक्ष साम्पाङले देशका पुराना दलहरूबाट समस्याको समाधान नहुने हुँदा श्रम संस्कृति पार्टीले सुशासन र भ्रष्टाचार न्यूनीकरणमा अग्रसर हुने, र त्यसका लागि सबै नागरिकले समर्थन गर्नु पर्ने बताए।

सन्देश स्पष्ट: देशलाई अगाडि बढाउन भाषण मात्र होइन, मेहनत, श्रम र इमानदार प्रयास अनिवार्य छन्।