“बालेन शाहको माघी सन्देश: ‘शैली फरक भए पनि भावना एउटै, हामी सबै नेपाली एकै छौं’”

काठमाडौँ
काठमाडौँ महानगरपालिकाका मेयर बालेन शाहले माघे संक्रान्तिको अवसरमा सबै नेपालीमा एकता, सांस्कृतिक विविधता र समृद्धिको सन्देश दिएका छन्।

सामाजिक सञ्जाल फेसबुकमार्फत शुभकामना दिँदै मेयर शाहले भने,

“सय थरि बाजा एउटै ताल, सय थरि गोडा एउटै चाल, सब हो एउटै हामी नेपाली, एउटै हाम्रो देश नेपाल।”

उनले माघीलाई केवल सूर्यको राशिप्रवेशको दिन मात्र नभई नेपाली समाजको बहुसांस्कृतिक संगमको पर्वको रूपमा व्याख्या गरे। मेयर बालेनले नेपाली समुदायको विविध उत्सव शैलीलाई समेट्दै, नेवार समुदायले ‘घ्यः चाकु संल्हू’, किरात समुदायले ‘येले संवत्’, र थारू समुदायले मौलिक संस्कृतिसहित माघी मनाउने तरिकालाई उल्लेख गरे।

उनले जोड दिए,

“चाडपर्व मनाउने नाम र शैली फरक भए पनि सबै नेपालीको भावना एउटै छ। रमाइलो र उत्सव मनाउने तरिका फरक भए पनि अन्ततः हामी सबै एउटै छौं।”

मेयर बालेनले यस सन्देशमार्फत नेपालीहरूलाई एकता, आपसी भाइचारा र नयाँ सुरुवातको अवसरको महत्त्व सम्झाउँदै समृद्धिको कामना गरेका छन्।