मन्त्री किरण थापा मगरः “स्वस्थ र शिक्षित नागरिकबिना समृद्धि सम्भव छैन” – वाग्मती प्रदेशले बनायो नयाँ रोडमैप

हेटौंडा, पुस २५ – वाग्मती प्रदेशका स्वास्थ्य मन्त्री किरण थापा मगरले आज हेटौँडामा आयोजित एमबिबिएस करिकुलम डेभलपमेन्ट वर्कसपको समापन समारोहमा शिक्षा र स्वास्थ्यलाई देश विकासको प्रमुख आधार भएको बताउनुभयो।

मन्त्री थापाले भन्नुभयो,

“भौतिक पूर्वाधार निर्माण गरेर मात्र विकास सम्भव छैन। जबसम्म नागरिक शिक्षित र स्वस्थ हुँदैनन्, तबसम्म समृद्ध वाग्मती प्रदेशको सपना पूरा हुँदैन।”

उहाँले यसै सोचअनुसार प्रदेश सरकार अघि बढिरहेको र आगामी दिनमा शिक्षा र स्वास्थ्य क्षेत्रमा अझ बढी लगानी र सुधार गरिने प्रतिबद्धता व्यक्त गर्नुभयो।

स्वास्थ्य क्षेत्रको सुधारतर्फ मन्त्री थापाले उल्लेख गर्नुभयो कि प्रदेश सरकारले जिल्ला स्तरका प्रादेशिक अस्पतालको स्तरोन्नति गर्दै विशेषज्ञ सेवा सुरु गरिसकेको छ। साथै, गाउँगाउँमा रहेका आधारभूत अस्पतालमा आवश्यक जनशक्ति पूर्ति गर्न मदन भण्डारी स्वास्थ्य विज्ञान प्रतिष्ठानले महत्वपूर्ण भूमिका खेल्ने विश्वास व्यक्त गरियो।

मन्त्रीको यो घोषणा प्रदेशको सामाजिक विकासको नयाँ अध्यायको संकेत गरेको विश्लेषकहरूले उल्लेख गरेका छन्।

Source :  ✍🏻✍🏻📸📸 Nabaraj Pathik