रास्वपाको बृहत्तर एकता सोमबार, राष्ट्रियसभा गृहबाट औपचारिक घोषणा

काठमाडौँ । राष्ट्रिय स्वतन्त्र पार्टी (रास्वपा) ले सोमबार बृहत्तर एकता घोषणा सभा गर्ने भएको छ । रास्वपाले आइतबार जारी गरेको विज्ञप्तिअनुसार भोलि दिउँसो १ बजे राष्ट्रियसभा गृहमा एकताको औपचारिक घोषणा गरिनेछ ।

रास्वपाले यसअघि काठमाडौँ महानगरपालिकाका मेयर बालेन शाह तथा उज्यालो नेपाल पार्टीसँग पुस १३ र १४ गते एकता गर्ने सहमति भइसकेको जानकारी दिएको थियो । सोमबार हुने घोषणा सभाबाट उक्त एकता प्रक्रियाले पूर्णता पाउने पार्टीको दाबी छ ।

घोषणा सभामार्फत नयाँ राजनीतिक सहकार्यको औपचारिक सुरुवात गर्दै आगामी राजनीतिक कार्यदिशा, संगठनात्मक संरचना र साझा एजेन्डा सार्वजनिक गरिने रास्वपाले जनाएको छ । पार्टीका अनुसार कार्यक्रमलाई व्यापक र अर्थपूर्ण बनाइनेछ ।

रास्वपाको यो एकतालाई समकालीन नेपाली राजनीतिमा नयाँ मोडको रूपमा हेरिएको छ । विशेषगरी वैकल्पिक राजनीतिमा विश्वास गर्ने मतदातामाझ यसले ठूलो चासो र चर्चा पाएको छ ।