अवैध लागूऔषध सहित ४ जना पक्राउ, प्रहरीले गर्‍यो छानबिन

काठमाडौं, २४ मंसिर

बर्दिया र सुर्खेतमा प्रहरीले अवैध लागूऔषधको ठूलो कारोबार रोक्दै ४ जनालाई पक्राउ गरेको छ।

बर्दिया घटनाः
बर्दिया, बढैयाताल गाउँपालिका-६ रानीपुरबाट १८ वर्षीय किशोरलाई ब्राउन सुगर जस्तो देखिने लागूऔषध २ ग्राम ८० मिलिग्राम सहित पक्राउ गरिएको छ। उनी बाँके कोहलपुर नगरपालिका-६ का बासिन्दा हुन्। इलाका प्रहरी कार्यालय मैनापोखरबाट खटिएको प्रहरीले उनलाई नियन्त्रणमा लिएको हो।

सुर्खेत घटनाः
सुर्खेत, भेरीगंगा नगरपालिका-१२ छिन्चुबाट नियन्त्रित लागूऔषध नाइट्राजेपाम २०० ट्याब्लेट र ट्रामाडोल ४५ ट्याब्लेट सहित ३ जनालाई पक्राउ गरिएको छ। पक्राउ पर्नेहरूमा भेरीगंगा–३ का २१ वर्षीय बिनोद न्यौपाने, कालिकोट शुभकालिका–८ का २० वर्षीय नबिन शाही र सोही गाउँपालिका–४ का २२ वर्षीय राजेश शाही रहेका छन्।

इलाका प्रहरी कार्यालय छिन्चुका टोलीले नेपालगंजबाट सुर्खेततर्फ जाँदै गरेको क.प्र.०२–००१ ज ०६२४ नम्बरको गाडीलाई जाँच गर्ने क्रममा उनीहरूलाई लागूऔषधसहित पक्राउ गरेको हो।

प्रहरीले यस सम्बन्धमा थप अनुसन्धान भइरहेको जनाएको छ।