जबरजस्ती करणीको अभियोगमा बाँके र कैलालीबाट दुई जना पक्राउ

काठमाडौं, जबरजस्ती करणी गरेको अभियोगमा प्रहरीले बाँके र कैलालीबाट दुई जनालाई पक्राउ गरेको छ।

बाँकेमा २१ वर्षीय युवक पक्राउ : बैजनाथ गाउँपालिका–२ पितमारी बस्ने २१ वर्षीय लालबहादुर राना क्षेत्रीलाई १६ वर्षीया बालिकामाथि जबरजस्ती करणी गरेको अभियोगमा प्रहरीले पक्राउ गरेको छ। पीडित बालिकामाथि जबरजस्ती करणी गरेको भन्दै परेको उजुरीका आधारमा इलाका प्रहरी कार्यालय कोहलपुरबाट खटिएको प्रहरीले उनलाई शुक्रबार दिउँसो पक्राउ गरेको जनाएको छ।

कैलालीमा २८ वर्षीय युवक पक्राउ : टीकापुर नगरपालिका–६ बेलुवा बस्ने २८ वर्षीय रामसेवक कुश्मी चौधरीलाई १९ वर्षीया किशोरीमाथि जबरजस्ती करणी गरेको अभियोगमा प्रहरीले पक्राउ गरेको छ। घटनाबारे परेको उजुरीका आधारमा प्रहरी चौकी सत्तीबाट खटिएको टोलीले उनलाई शनिबार बिहान पक्राउ गरेको हो।

दुवै घटनाका सम्बन्धमा प्रहरीले आवश्यक अनुसन्धान भइरहेको जनाएको छ।