क्यानडा पठाइदिन्छु भन्दै ३ लाख ठगी गर्ने महिला पक्राउ!

काठमाडौं, २५ कात्तिक ।
“क्यानडा पठाइदिन्छु” भन्ने मीठो प्रलोभन देखाएर रकम ठगी गर्ने एक महिला प्रहरीको फन्दामा परेकी छन् ।

पक्राउ परेकी महिला मकवानपुर हेटौंडा उपमहानगरपालिका–६ घर भएकी, हाल कागेश्वरी मनोहरा नगरपालिका–६ बस्ने २६ वर्षीया मनिषा अधिकारी हुन्।

उनीमाथि एक पीडितबाट ३ लाख रुपैयाँ लिएर सम्पर्कबिहीन भएको आरोप छ।
पीडितको उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको टोलीले उनलाई कागेश्वरी मनोहराबाट आइतबार पक्राउ गरेको हो।

प्रहरीले मनिषालाई थप अनुसन्धान र कानूनी कारबाहीका लागि वैदेशिक रोजगार विभाग, ताहाचल, काठमाडौं पठाएको छ।

प्रहरीले नागरिकलाई वैदेशिक रोजगारीका नाममा ठगी गर्ने दलाल र फर्जी एजेन्टहरूबाट सतर्क रहन आग्रह गरेको छ।

“कागजपत्र र इजाजतपत्र नदेखाउने कसैलाई पैसा नदिनुहोस्,” प्रहरीको सन्देश।