पहिरोले पुरिएर जाजरकोटमा चार जनाको मृत्यु

जाजरकोट, अविरल वर्षापछि आएको पहिरोमा पुरिएर जाजरकोटको भेरी नगरपालिका–२ रिसाङ क्षेत्रमा चार जनाको मृत्यु भएको छ।

मृत्यु हुनेमा भेरी–२ का ५२ वर्षीय केदार कार्की, ५४ वर्षीय उमासिंह खत्री, ७५ वर्षीया रती खत्री र ७० वर्षीय भीमबहादुर कार्की रहेका छन्।

पहिरोले घरहरू भत्किएर जोखिम बढेपछि जिल्ला प्रहरी कार्यालय जाजरकोटबाट खटिएको टोलीले खोज तथा उद्धार गर्ने क्रममा उमासिंह, रती र भीमबहादुरको शव आइतबार बिहान फेला पारेको प्रहरीले जनाएको छ। गम्भीर घाइते केदार कार्कीको कोहलपुरस्थित मेडिकल कलेजमा उपचारका क्रममा मृत्यु भएको हो।

घाइतेमध्ये एक जनालाई थप उपचारका लागि कोहलपुर रिफर, एक जनाको सोही अस्पताल तथा एक जनाको भेरी अस्पताल नेपालगञ्जमा उपचार भइरहेको छ। चार जना उपचारपछि डिस्चार्ज भएका छन्।

पहिरो प्रभावित क्षेत्रमा प्रहरीले खोज तथा उद्धार कार्य जारी राखेको जनाएको छ।