कुलमान घिसिङको प्रमुख आतिथ्यतामा आश्विन २४ गते बाल उद्यान सामुदायिक सेवा समितिको भव्य शुभकामना आदानप्रदान तथा सम्मान कार्यक्रम हुँदै!

काठमाडौं, नेपालीहरूको महान चाड बडा दशैं, शुभ दीपावली, नेपाल संवत ११४७ तथा छठ पर्व २०८३ को सुअवसरमा बाल उद्यान सामुदायिक सेवा समितिको आयोजनामा आगामी आश्विन २४ गते शनिबार बिहान ८:०० बजेबाट एक भव्य शुभकामना आदानप्रदान, जलपान तथा सम्मान कार्यक्रम आयोजना हुँदैछ। नयाँबजारस्थित प्याराडाइज बैंक्वेट, ढलको (का.म.पा. वडा नं. १७, काठमाडौं) मा हुने यस ऐतिहासिक तथा प्रेरणादायी कार्यक्रमको सभापतित्व आयोजक संस्था बाल उद्यान सामुदायिक सेवा समितिका ऊर्जाशील अध्यक्ष आदरणीय श्री रामकुमार श्रेष्ठज्यूले गर्नुहुनेछ। तीन दशक लामो सुझाव, सहकार्य र सामाजिक उत्तरदायित्वको गौरवशाली यात्रा बोकेको यस संस्थाको यो कार्यक्रमले समाजमा एकता, आपसी सद्भाव र उच्च सकारात्मक ऊर्जा थप्नेछ।

यस भव्य तथा सुशोभित कार्यक्रमको उद्घोषण तथा सञ्चालन चर्चित सञ्चारकर्मी तथा मिडिया ठाँटी प्रा.लि. का सीईओ एवं ठाँटी खबरका सम्पादक श्री दामोदर भट्टज्यूबाट हुनेछ। कार्यक्रममा उज्यालो नेपाल अभियानका महानायक, उज्यालो नेपाल पार्टीका अध्यक्ष तथा नेपाल सरकारका पूर्वमन्त्री ऊर्जा, जलस्रोत तथा सिँचाइ मन्त्री आदरणीय श्री कुलमान घिसिङज्यू प्रमुख अतिथिका रूपमा उपस्थित हुनुहुनेछ। उहाँको ओजस्वी उपस्थिति र विशेष सम्बोधनले कार्यक्रमको रौनक र हाइटलाई अझ उच्च शिखरमा पुर्‍याउनेछ। यसैगरी, कार्यक्रममा विशिष्ट अतिथिका रूपमा नेपाल प्रहरीका आदरणीय एआईजी श्री दानबहादुर कार्कीज्यू, विशिष्ट अतिथि श्री बुद्धि नारायण श्रेष्ठज्यू, पूर्व डीएसपी श्री शिवजी श्रेष्ठज्यू, र का.म.पा. वडा नं. १७ का वडा अध्यक्ष श्री नवीन मानन्धरज्यूको गरिमामय आसन ग्रहण रहनेछ। साथै, वडा नं. १५ र १६ का वडा अध्यक्षज्यूहरू, ओखलढुंगा सेवा समाजका अध्यक्षज्यू, विशेष अतिथिद्वय श्री प्रद्युम्न चित्रकार र श्री राजदेव महतो, मेलम्ची आयोजनाका प्रमुख श्री प्रजन हाडा लगायत सम्पूर्ण उपस्थित विशिष्ट व्यक्तित्वहरूको आतिथ्यताले कार्यक्रमलाई भव्य र भिआइपी स्वरूप प्रदान गर्नेछ।

कार्यक्रमको आरम्भमा पहिलो चरण अन्तर्गत उपस्थित सम्पूर्ण महानुभावहरूको लागि चियापान (जलपान) कार्यक्रम राखिएको छ। त्यसपश्चात सभाध्यक्ष, प्रमुख अतिथि, विशिष्ट अतिथि तथा अतिथिहरूको गरिमामय आसन ग्रहण, आयोजक टिमका पदाधिकारीहरूबाट खादा, माला र ब्याच वितरण, राष्ट्रिय गानको सम्मान तथा हालसालै रसुवा जिल्लामा आएको भीषण बाढीका कारण धनजनको क्षतिप्रति गहिरो शोक व्यक्त गर्दै एक मिनेटको मौन धारण कार्यक्रम हुनेछ। तत्पश्चात, प्रमुख अतिथि श्री कुलमान घिसिङज्यूले गमलामा रहेका पारिजातको बिरुवा र फलफूलको राजा आँपको बिरुवामा पानी हालेर यस बहुप्रतीक्षित कार्यक्रमको नमुनायोग्य ढङ्गले भव्य उद्घाटन गर्नुहुनेछ। कार्यक्रममा आयोजक संस्थाका सचिव श्री कृष्ण प्राजुलीज्यूबाट स्वागत मन्तव्य तथा संस्थाको संक्षिप्त परिचय प्रस्तुत हुनेछ भने स्थानीय संस्कृति र परम्परा जगेर्ना गर्ने उद्देश्यले आकर्षक नेवारी सांस्कृतिक नृत्य प्रस्तुत गरिनेछ। यसैगरी, विभिन्न मन्तव्य तथा शुभकामना आदानप्रदानको क्रमसँगै माहोललाई अझ सांगीतिक र उल्लासपूर्ण बनाउन प्रसिद्ध गीत ‘मेरो प्यारो ओखलढुंगा’ प्रस्तुत गरिनेछ।

विगत २०१२/२०१३ (२०७२/०७३) सालदेखि का.म.पा. वडा नं. १७ मा अवस्थित बाल उद्यान सामुदायिक सेवा समितिले समाज परिवर्तनका लागि गरेका प्रमुख १० जनहितकारी तथा प्रशंसनीय कार्यहरूले यस संस्थाको अतुलनीय योगदानलाई प्रष्ट पार्छ। संस्थाले नयाँबजार खुसिबूँ टाउन प्लानिङ क्षेत्रमा स्वदेशी तथा विदेशी पाहुनालाई गन्तव्यमा पुग्न सहजताका लागि बाटोको लोकेशन बोर्ड राख्ने सराहनीय पहल गर्दा १७ नं. वडा अध्यक्षज्यूले महानगर प्रहरी लगाएर निकालेको तीतो यथार्थका बाबजुद पनि समाजसेवालाई निरन्तरता दिँदै आएको छ। वडा नं. १६ र १७ मा सिक्री लुट्ने तथा कुटपिट जस्ता आपराधिक गतिविधि रोक्न आफ्नै पहलमा ४१ वटा सीसी क्यामेरा जडान गरिएको छ, जसलाई ६/७ वर्ष हुँदा पनि वडाबाट कुनै सहयोग प्राप्त भएको छैन। यसैगरी, विष्णुमती करिडोरको वडा नं. १६ र १७ मा एभोकाडो लगायत फलफूलका बिरुवाहरू रोपेर वृक्षारोपण तथा हरियाली प्रवर्द्धन गरिएको छ भने आफ्नै व्यक्तिगत भवनमा सीसी क्यामेरा राखी दुर्घटना, लुटपाट तथा अपहरण रोक्न सुरक्षा निकायहरूलाई निरन्तर सहयोग गर्दै आइएको छ। वडा नं. १५, १६ र १७ मा सडक सरसफाइ तथा ललितपुर महानगरपालिकाको ढल महाशाखा (जावलाखेल) सँग समन्वय गरी ढल मङ्गल सरसफाइ गराउने कार्य होस् वा प्रधानमन्त्री, मन्त्री र मेलम्ची आयोजना निर्देशनालयमा अनुरोध गरी वडा नं. १६ र १७ को प्लानिङभित्र पाइप राख्ने पहल गरी काम सम्पन्न गराउने कुरा हो- संस्था सधैं अग्रपङ्क्तिमा रहेको छ। यसबाहेक, भूकम्प तथा लकडाउनको असहज परिस्थितिमा सुरक्षाकर्मीहरूको उपस्थितिमा चामल, दाल र तेल वितरण गर्ने राहत कार्य, इन्द्रायणी मन्दिरमा ७ वटा र स्वयम्भूको उकालोमा विष्णुमती करिडोरमा भक्तजन तथा बटुवाहरूका लागि आरामदायी विश्राम बेञ्च व्यवस्थापन, सोह्रखुट्टेमा सार्वजनिक शौचालय निर्माणका लागि हस्ताक्षर अभियान चलाई स्वर्गीय मुकुन्द रिजालको सिफारिसमा गरिएको पहल, तथा वडा नं. १५ र १७ का सामुदायिक विद्यालयहरू, सामुदायिक अस्पतालहरू र क्षेत्रपाटी निःशुल्क चिकित्सालयमा वाटर गार्ड उपलब्ध गराए जस्ता महान कार्यहरू यस संस्थाले सफलतापूर्वक सम्पन्न गरेको छ।

अन्तमा, प्रमुख अतिथि तथा विशिष्ट व्यक्तित्वहरूको अति प्रेरणादायी र मार्गदर्शनयुक्त मन्तव्य पश्चात् सभाध्यक्ष एवं संस्थाका अध्यक्ष आदरणीय श्री रामकुमार श्रेष्ठज्यूको समापन मन्तव्य र धन्यवाद ज्ञापनसँगै औपचारिक कार्यक्रमको भव्य समापन हुनेछ। यस ऐतिहासिक कार्यक्रमको समापनसँगै उपस्थित सम्पूर्ण महानुभावहरूलाई जलपान तथा खाना/खाजा कक्षमा भोजन ग्रहणको लागि हार्दिक निमन्त्रणा टक्राइएको छ। आगामी आश्विन २४ गते शनिबार बिहान ८:०० बजे प्याराडाइज बैंक्वेट, ढलकोमा आयोजना हुने यस प्रेरणादायी, उर्जावान् तथा भव्य शुभकामना आदानप्रदान एवं सम्मान कार्यक्रममा उपस्थित भई कार्यक्रमलाई ऐतिहासिक रूपमा सफल बनाइदिनुहुन समस्त दाजुभाइ, दिदीबहिनी, बुद्धिजीवी, समाजसेवी, सुरक्षाकर्मी तथा पत्रकार मित्रहरूमा हार्दिक अनुरोध गरिएको छ।