क्यानडा पठाइदिन्छु भन्दै १ लाख ८५ हजार ठगी गर्ने व्यक्ति पक्राउ

काठमाडौं, आकर्षक तलबसहित वैदेशिक रोजगारीका लागि क्यानडा पठाइदिन्छु भन्दै रकम ठगी गरेको अभियोगमा प्रहरीले एक जनालाई पक्राउ गरेको छ।

पक्राउ पर्नेमा भक्तपुरको सूर्यविनायक नगरपालिका–८ बस्ने तथा पर्वत मोदी गाउँपालिका–५ घर भएका ३३ वर्षीय चुडामणी रखाल रहेका छन्।

प्रहरीका अनुसार रखालले क्यानडा पठाइदिने भन्दै एक जना पीडितबाट १ लाख ८५ हजार रुपैयाँ लिएका थिए। रकम लिएपछि सम्पर्कविहीन भएको भन्दै पीडितले प्रहरीमा उजुरी दिएका थिए।

उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरीले खोजी गर्ने क्रममा रखाललाई भक्तपुरको सूर्यविनायक नगरपालिका–२ बाट बुधबार पक्राउ गरेको हो।

पक्राउ परेका रखाललाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल काठमाडौं पठाइएको प्रहरीले जनाएको छ।

प्रहरीले वैदेशिक रोजगारीका नाममा आकर्षक तलब तथा विदेश पठाइदिने प्रलोभनमा रकम बुझाउनुअघि सम्बन्धित व्यक्ति तथा म्यानपावर कम्पनीको आधिकारिकता जाँच गर्न आग्रह गरेको छ।