ठमेलबाट १७ करोडभन्दा बढीको अवैध डिजिटल मुद्रा कारोबार गर्ने चिनियाँ नागरिक पक्राउ

काठमाडौँ, नेपाली नागरिकहरूलाई प्रलोभनमा पारी ठगी गरेको र अवैध अभौतिक मुद्रा (Digital Currency) को कारोबारमा संलग्न रहेको अभियोगमा एक चिनियाँ नागरिक पक्राउ परेका छन्।

पक्राउ पर्नेमा काठमाडौँ महानगरपालिका-२६ ठमेल बस्ने ३५ वर्षीय चिनियाँ नागरिक Zhu Yi Feng रहेका छन्। उनलाई जिल्ला प्रहरी परिसर काठमाडौँको टोलीले बिहीबार ठमेल क्षेत्रबाटै नियन्त्रणमा लिएको हो।

ठगीको तरिका र १७ करोडको कारोबार

प्रहरीका अनुसार उनले विभिन्न सामाजिक सञ्जालमार्फत नेपाली नागरिकहरूसँग सम्पर्क बढाउने र विभिन्न प्रलोभन देखाएर विश्वासमा पार्ने गरेका थिए। उनले नेपालीकै बैंक खाताहरू प्रयोग गरी ठगी गर्ने र सो रकमलाई अभौतिक मुद्रामा रूपान्तरण गरी कारोबार गर्ने गरेको सूचना प्रहरीले प्राप्त गरेको थियो।

प्रारम्भिक अनुसन्धानका क्रममा उनले हालसम्म १७ करोड ७९ लाख ७० हजार ३ सय ७१ रुपैयाँ २३ पैसा बराबरको अभौतिक मुद्राको कारोबार गरेको सनसनीपूर्ण तथ्य खुलेको छ।

५ दिनको म्याद थप

पक्राउ परेका चिनियाँ नागरिक Zhu Yi Feng माथि थप अनुसन्धान गर्न जिल्ला अदालत काठमाडौँबाट ५ दिनको म्याद थप अनुमति लिइएको छ। प्रहरीले यस नेटवर्कमा अन्य व्यक्तिहरूको संलग्नताबारे पनि सूक्ष्म अनुसन्धान गरिरहेको जनाएको छ।