एमाले महाधिवेशनले राष्ट्रिय राजनीतिलाई सकारात्मक सन्देश दियो: प्रदीप ज्ञवाली

काठमाडौं, पुस ३ — नेकपा एमालेका नेता प्रदीप ज्ञवालीले ११औँ राष्ट्रिय महाधिवेशनमा देखिएको उत्साहजनक सहभागिता र लोकतान्त्रिक प्रतिस्पर्धाले पार्टीको आन्तरिक लोकतन्त्र मात्र होइन, समग्र राष्ट्रिय राजनीतिका लागि पनि महत्वपूर्ण सन्देश दिएको बताउनुभएको छ।

अत्यन्त शान्तिपूर्ण र उत्साहजनक रूपमा मतदान प्रक्रिया सम्पन्न भएपछि नेता ज्ञवालीले पछिल्ला राजनीतिक घटनाक्रमपछि मूलधारका राजनीतिक दलहरूको सान्दर्भिकता समाप्त भएको भन्ने भाष्यलाई एमालेले व्यवहारबाटै खण्डन गरेको उल्लेख गर्नुभयो। उहाँले भदौको अन्तिम सातापछिका घटनाक्रमका आधारमा निर्माण गरिएको नकारात्मक भाष्यलाई मङ्सिर २७ गते सल्लाघारीमा देखिएको विशाल जनसहभागिता र नेतृत्व चयनका क्रममा भएको स्वस्थ, सौहार्दपूर्ण तथा कमरेडली प्रतिस्पर्धाले कमजोर बनाएको बताउनुभएको छ।

नेता ज्ञवालीले बिहीबार बिहान सामाजिक सञ्जाल फेसबुकमार्फत लेख्दै भन्नुभयो, “नेतृत्व निर्माणका लागि भएको लोकतान्त्रिक प्रतिस्पर्धाले पार्टीको आन्तरिक लोकतन्त्रलाई जीवन्त बनाएको छ।” उहाँका अनुसार महाधिवेशनमा देखिएको उच्च सहभागिता र लोकतान्त्रिक अभ्यासको प्रभाव पार्टीभित्र मात्र सीमित नरही देशको राजनीतिमा समेत सकारात्मक रूपमा पर्नेछ।

नेकपा (एमाले) को ११औँ राष्ट्रिय महाधिवेशनअन्तर्गत नेतृत्व चयनका लागि हिजो बिहान ९ बजेदेखि सुरु भएको मतदान प्रक्रिया आज बिहान सम्पन्न भएको हो। कुल २,२६३ प्रतिनिधिमध्ये २,२२७ जनाले मतदान गरेसँगै महाधिवेशनको निर्वाचन प्रक्रिया औपचारिक रूपमा टुंगिएको छ।

महाधिवेशनमा विद्युतीय मतदान मेसिनमार्फत निर्वाचन गरिएको थियो। ९८ प्रतिशतभन्दा बढी प्रतिनिधिको सहभागिताले पार्टी संगठनको सक्रियता र महाधिवेशनप्रतिको उच्च चासो प्रष्ट पारेको नेताहरूले विश्लेषण गरेका छन्।

---

Source : Nabaraj Pathik