राजधानी र बुटवलमा प्रहरीले एकैसाथ गरेको कारबाहीमा जुवातास खेलिरहेका १५ जना पक्राउ

काठमाडौं, २४ कात्तिक – राजधानी र बुटवलमा प्रहरीले एकैसाथ गरेको कारबाहीमा जुवातास खेलिरहेका १५ जना पक्राउ परेका छन्!

काठमाडौं मुलपानीमा ठूलो पकड

कागेश्वरी मनोहरा–६, मुलपानी सृजनाटोलस्थित निर्मला मोक्तान (५५ वर्ष) द्वारा सञ्चालित उर्मिला खाजा घरमा आइतबार राति प्रहरीले छापा मारेको थियो।

उक्त खाजाघरमा निर्मला मोक्तानसहित १३ जना जुवातास खेलिरहेको अवस्थामा पक्राउ परेका हुन्।
प्रहरीले त्यहाँबाट नगद १ लाख ८० हजार ७ सय रुपैयाँ र ३ बुक तास बरामद गरेको जनाएको छ।

बुटवलमा पनि जुवा

त्यसैगरी, रूपन्देही बुटवल उपमहानगरपालिका–९ कालिकानगरस्थित चौतारी रेष्टुरेन्टमा पनि जुवातास खेलिरहेको अवस्थामा नवलपरासी पश्चिम सुनवल–४ का शिवलाल सुबेदी (५० वर्ष) सहित २ जना पक्राउ परेका छन्।

उनीहरूबाट १ लाख ५० हजार ५ सय रुपैयाँ नगद र १ बुक तास समेत फेला परेको प्रहरीले जनाएको छ।

“जुवा, तास, सट्टेबाजीलगायत गतिविधिमा संलग्न जो कोहीमाथि कडा कारबाही गरिनेछ।”