काठमाडौं, भदौ १ — त्रिभुवन अन्तर्राष्ट्रिय विमानस्थलबाट ठूलो परिमाणमा विदेशी मुद्रासहित नेपाल वायुसेवा निगमका दुई कर्मचारी पक्राउ परेका छन्।

प्रहरीका अनुसार काठमाडौं महानगरपालिका–२६, गोंगबुकी ५४ वर्षीया जननी बज्राचार्य र गोरखा नगरपालिका–३ की ३५ वर्षीया ममता पाण्डेलाई आइतबार राति विमानस्थलको अन्तर्राष्ट्रिय प्रस्थान ह्यान्ड ब्यागेज चेकिङ एरियाबाट पक्राउ गरिएको हो।

नेपाल एयरलाइन्सको उडानमार्फत काठमाडौं–क्वालालम्पुर जान लागेका उनीहरूलाई जाँच गर्ने क्रममा जननी बज्राचार्यको साथबाट ४ हजार ३०० अमेरिकी डलर र १२ हजार ३७२ मलेसियन रिङ्गिट फेला परेको प्रहरीले जनाएको छ।

त्यस्तै, ममता पाण्डेको साथबाट ४ हजार २०० अमेरिकी डलर र १२ हजार ३२८ मलेसियन रिङ्गिट बरामद गरिएको छ।

विमानस्थल सुरक्षा कार्यालयबाट खटिएको प्रहरीले जाँचका क्रममा विदेशी मुद्रा फेला पारेपछि दुवैलाई नियन्त्रणमा लिएको जनाएको छ।

पक्राउ परेका दुवै जनालाई आवश्यक अनुसन्धान तथा कानुनी कारबाहीका लागि सम्पत्ति शुद्धीकरण अनुसन्धान विभाग, पुल्चोक, ललितपुरपठाइएको प्रहरीले जनाएको छ।

घटनाबारे थप अनुसन्धान भइरहेको छ।