औषधि पसल सञ्चालकको हत्या आरोपमा पाँच जना पक्राउ

जाजरकोट, जाजरकोटको भेरी नगरपालिका–११, जगतिपुरमा औषधि पसल सञ्चालन गर्दै आएका दैलेख नारायण नगरपालिका–२ का ३२ वर्षीय दिपक कुमार थापाको मृत्यु भएको घटनामा संलग्न रहेको अभियोगमा प्रहरीले पाँच जनालाई पक्राउ गरेको छ।

प्रहरीका अनुसार पक्राउ पर्नेमा भेरी नगरपालिका–८ का ३३ वर्षीय बिरेन्द्र खत्री, भेरी–९ का २१ वर्षीय निरज रोकाय, २१ वर्षीय शिशिर योगी गोसाई, २४ वर्षीय लक्ष्मण रोकाय र २८ वर्षीय बिनोद गोसाई रहेका छन्।

घटनाअनुसार साउन २५ गते राति भेरी नगरपालिका–१० नुवागाउँमा बिरेन्द्र खत्रीसहितका व्यक्तिहरूले कुटपिट गर्दा दिपक गम्भीर घाइते भएका थिए। घाइते थापाको नेपालगञ्जस्थित केयर सिटी अस्पतालमा उपचारका क्रममा साउन २८ गते मृत्यु भएको प्रहरीले जनाएको छ।

घटनाको अनुसन्धानका क्रममा जिल्ला प्रहरी कार्यालय जाजरकोटबाट खटिएको टोलीले उनीहरूलाई पक्राउ गरेको हो।

पक्राउ परेका पाँचै जनाविरुद्ध जिल्ला अदालत जाजरकोटबाट कर्तव्य ज्यान मुद्दामा १० दिनको म्याद थप अनुमति लिइएको छ। घटनाबारे थप अनुसन्धान भइरहेको प्रहरीले जनाएको छ।