देशभर दुई स्थानबाट १४ जना जुवातास खेल्दा पक्राउ

काठमाडौं, ९ कात्तिक —

देशका विभिन्न स्थानमा प्रहरीले जुवातास खेलिरहेको अवस्थामा १४ जना व्यक्तिलाई पक्राउ गरेको छ।

सिन्धुपाल्चोकको जुगल गाउँपालिका–६ हाब्रास्थित एक घरमा जुवातास खेलिरहेको अवस्थामा स्थानीय ४२ वर्षीय नन्दराज श्रेष्ठसहित ५ जनालाई गए राति प्रहरीले नियन्त्रणमा लिएको हो।
इलाका प्रहरी कार्यालय जलबिरेबाट खटिएको टोलीले उनीहरूकहाँबाट नगद ८५ हजार ४५ रुपैयाँ र १ बुक तास बरामद गरेको जनाएको छ।

त्यसैगरी कञ्चनपुरको भीमदत्त नगरपालिका–१ भासीस्थित घरमा जुवातास खेलिरहेको अवस्थामा सोही नगरपालिका–६ ऐठपुरका ५० वर्षीय दिपक पाठकसहित ९ जनालाई शनिबार दिउँसो प्रहरीले पक्राउ गरेको हो।
जिल्ला प्रहरी कार्यालय कञ्चनपुरबाट खटिएको टोलीले उनीहरूकहाँबाट नगद ५५ हजार १५ रुपैयाँ र ८ बुक तास बरामद गरेको जनाएको छ।

दुवै घटनाबारे प्रहरीले आवश्यक अनुसन्धान सुरु गरेको जनाएको छ।