क्यानडा पठाइदिन्छु भन्दै १२ लाख ठगी गर्ने दुई जना प्रहरी फन्दामा

काठमाडौँ, वैदेशिक रोजगारीका नाममा सर्वसाधारणलाई ठगी गर्ने क्रम नरोकिँदै क्यानडा पठाइदिन्छु भन्दै लाखौँ रुपैयाँ असुल गरेर फरार भएका दुई जनालाई प्रहरीले पक्राउ गरेको छ। आकर्षक तलब र राम्रो अवसरको प्रलोभन देखाएर ठगी गरेको अभियोगमा काठमाडौँ महानगरपालिका-२० बस्ने ४९ वर्षीया रिता गौतम र ३१ वर्षीय विमोचन राज कुँवरलाई बिहीबार प्रहरीले नियन्त्रणमा लिएको हो।

उनीहरूले क्यानडा पठाइदिने बहानामा एक जना पीडितबाट १२ लाख रुपैयाँ असुलेर लामो समयदेखि सम्पर्कविहीन बनेका थिए। ठगिएपछि पीडितले दिएको उजुरीका आधारमा काठमाडौँ उपत्यका अपराध अनुसन्धान कार्यालय टेकुबाट खटिएको विशेष प्रहरी टोलीले खोजतलास गरी उनीहरूलाई काठमाडौँ महानगरपालिका-१२ बाट पक्राउ गरेको हो।

पक्राउ परेका दुवै जनालाई थप अनुसन्धान तथा आवश्यक कानुनी कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।