चितवनबाट अन्तर्राष्ट्रिय कल बाइपासका उपकरणसहित भारतीय नागरिक पक्राउ

काठमाडौँ,  अवैध रूपमा अन्तर्राष्ट्रिय कल बाइपास (भीओआईपी) सञ्चालन गरिरहेको अवस्थामा भारी मात्रामा प्राविधिक उपकरणसहित एक भारतीय नागरिकलाई प्रहरीले पक्राउ गरेको छ। केन्द्रीय अनुसन्धान ब्युरो (CIB) र जिल्ला प्रहरी कार्यालय चितवनको संयुक्त टोलीले नेपाल टेलिकम र एनसेल आजियाटा लिमिटेडको प्राविधिक सहयोगमा चितवनको भरतपुर महानगरपालिका-२, आँपटारीबाट २५ वर्षीय भारतीय नागरिक कठराम नितिन (Kathram Nithin) लाई नियन्त्रणमा लिएको हो।

पक्राउ परेका नितिनको डेरा तथा परिसरबाट प्रहरीले भीओआईपीमा प्रयोग भएका २६ थान मोबाइल, ९५ थान सिमकार्ड, ४ थान सीपीयू, २ थान ल्यापटप, ६ थान यूएसबी, २ थान राउटर, १ थान इन्भर्टर, २ थान ब्याट्री तथा विभिन्न प्रकारका डेटा केबलहरू बरामद गरेको छ। प्रारम्भिक अनुसन्धानका क्रममा बरामद गरिएका यी सम्पूर्ण सामग्रीहरू गैरकानुनी रूपमा दूरसञ्चार सेवा अवरुद्ध गरी कल बाइपास गर्न प्रयोग गरिएको पाइएको छ।

राजस्व चुहावट र दूरसञ्चार प्रणालीमाथि गैरकानुनी हस्तक्षेप गरी सञ्चालन गरिएको उक्त अवैध धन्दाबारे प्रहरीले पक्राउ परेका भारतीय नागरिकमाथि थप अनुसन्धान तथा कानुनी कारबाहीको प्रक्रिया अगाडि बढाएको छ।