बानेश्वरमा सुन चोरी गर्ने युवक पक्राउ, १३८ ग्रामभन्दा बढी गरगहना बरामद

काठमाडौं, ३१ भदौ । काठमाडौं महानगरपालिका–१० बानेश्वरस्थित एक घरबाट सुनका गरगहना चोरी गरेको आरोपमा प्रहरीले २३ वर्षीय दिपेश मग्रान्तीलाई पक्राउ गरेको छ।

रामेछाप नगरपालिका–१ घर भई काठमाडौं महानगरपालिका–१० बानेश्वर बस्दै आएका मग्रान्तीलाई प्रहरीले सोमबार साँझ बानेश्वरबाट पक्राउ गरेको हो।

प्रहरीका अनुसार सोमबार बिहान बानेश्वरस्थित एक घरबाट सुनका विभिन्न गरगहना चोरी भएको घटनाको अनुसन्धानका क्रममा काठमाडौं उपत्यका अपराध अनुसन्धान कार्यालय, टेकुसमेतबाट खटिएको टोलीले उनलाई पक्राउ गरेको हो।

पक्राउ परेका मग्रान्तीको साथबाट करिब १३८ ग्राम ६१० मिलिग्राम तौल बराबरका सुनका विभिन्न गरगहना बरामद गरिएको प्रहरीले जनाएको छ।

उनलाई थप अनुसन्धान तथा आवश्यक कारबाहीका लागि प्रहरी वृत्त बानेश्वर पठाइएको छ।

बानेश्वरमा सुन चोरीपछि प्रहरीको अनुसन्धान तीव्र, चोरीका गरगहना बरामद!