नेपालको गौरव बोकेर पोल्याण्ड प्रस्थान गरे मृदुल आचार्य, मिस्टर सुप्रानेशनल २०२६ मा विश्वमञ्चमा नेपालको चुनौती

काठमाडौं। नेपालका लागि अर्को गौरवमय क्षण आएको छ। मिस्टर सुप्रानेशनल नेपाल २०२६ का विजेता मृदुल आचार्य विश्वकै प्रतिष्ठित पुरुष सौन्दर्य प्रतियोगिता मिस्टर सुप्रानेशनल २०२६ मा नेपालको प्रतिनिधित्व गर्न २० जुलाई मा पोल्याण्ड प्रस्थान गरेका छन्। प्रतियोगिताको भव्य ग्रान्ड फिनाले १ अगस्ट २०२६ मा पोल्याण्डको मालोपोल्स्का (Małopolska) मा आयोजना हुँदैछ।

व्यक्तित्व, नेतृत्व क्षमता, अनुशासन, विनम्रता र व्यावसायिक उत्कृष्टताका कारण चर्चित मृदुलले प्रतियोगिताको प्रारम्भिक चरणदेखि नै प्रभावशाली उपस्थिति जनाइसकेका छन्। विशेष गरी अन्तर्राष्ट्रिय रूपमा निकै महत्वपूर्ण मानिने “Supra Chat” चुनौतीमा उनी दोस्रो चरण (Second Round) मा प्रवेश गर्न सफल भएका छन्, जसले विश्वमञ्चमा नेपालको सम्भावनालाई अझ बलियो बनाएको छ।

नेपालले यसअघि पनि मिस्टर सुप्रानेशनलमा उल्लेखनीय सफलता हासिल गर्दै आएको छ। धिरोज काजी बस्नेत टप–२० मा पर्न सफल भएका थिए भने सनीश श्रेष्ठ ले प्रतिष्ठित Mr. Talent उपाधि जितेका थिए। त्यस्तै डा. सन्तोष उपाध्याय ले नेपालको इतिहासकै उत्कृष्ट प्रदर्शन गर्दै थर्ड रनर–अप बन्नुका साथै Mr. Influencer उपाधि जितेर अन्तर्राष्ट्रिय मञ्चमा नेपालको प्रतिष्ठा अझ उचाइमा पुर्‍याएका थिए।

मिस्टर सुप्रानेशनल नेपाल का राष्ट्रिय निर्देशक डा. सन्तोष उपाध्याय ले मृदुल आचार्यप्रति पूर्ण विश्वास व्यक्त गर्दै यस वर्ष नेपालले नयाँ इतिहास रच्ने अपेक्षा व्यक्त गरेका छन्।

उनले भने,

“मृदुलमा विश्वस्तरमा प्रतिस्पर्धा गर्न आवश्यक सम्पूर्ण गुणहरू छन्। उनको व्यक्तित्व, अनुशासन, विनम्रता, बौद्धिक क्षमता र निरन्तर मेहनतले उनी अन्तर्राष्ट्रिय मञ्चमा नेपालको झण्डा अझ उचाइमा पुर्‍याउनेमा हामी विश्वस्त छौं। विगत पाँच संस्करणमा नेपालले दुई उत्कृष्ट प्लेसमेन्ट र दुई सबटाइटल जितिसकेको छ। छैटौं संस्करणमा मृदुलले नेपालका लागि तेस्रो प्लेसमेन्ट ल्याउने विश्वास हामीले गरेका छौं।”

आयोजक संस्था सनुर्भी इन्टरनेशनल प्रा.लि. ले मृदुलको यात्रा केवल व्यक्तिगत उपलब्धि नभई सम्पूर्ण नेपालीको गौरव र राष्ट्रिय पहिचानलाई विश्वमञ्चमा प्रस्तुत गर्ने अवसर भएको उल्लेख गर्दै सम्पूर्ण नेपालीलाई उनको सफलताका लागि शुभकामना, साथ र समर्थन गर्न आग्रह गरेको छ।

अब सम्पूर्ण नेपालीको नजर १ अगस्ट मा हुने ग्रान्ड फिनालेमा केन्द्रित छ, जहाँ मृदुल आचार्यले विश्वभरका उत्कृष्ट प्रतिस्पर्धीहरूसँग नेपालको झण्डा फहराउँदै प्रतिष्ठित उपाधिका लागि प्रतिस्पर्धा गर्नेछन्।

(फोटो/समाचार स्रोत : डा. सन्तोष उपाध्याय)