हरित बैंकिङ प्रवर्द्धनका लागि कुमारी बैंक र मिर्मिरे इनिसियटिभ्सबीच रणनीतिक साझेदारी

सेवा, प्रक्रिया अनि रणनीतिक साझेदारीमार्फत दिगो विकास प्रवर्द्धनमा प्रतिबद्ध कुमारी बैंक लिमिटेडले दिगो बैंकिङ अभ्यास प्रवर्द्धनका लागि मिर्मिरे इनिसियटिभ्ससँग रणनीतिक परियोजनाका लागि सम्झौता गरेको छ।

उक्त सम्झौतापत्रमा कुमारी बैंकका प्रमुख लगानी तथा बजार व्यवस्थापन अधिकृत श्री चन्दन कार्की तथा मिर्मिरे इनिसियटिभ्सका अध्यक्ष श्री श्याम सुन्दर श्रेष्ठले हस्ताक्षर गर्नुभएको हो। वातावरण तथा हरित बैंकिङ प्रवर्द्धनमा केन्द्रित यस सम्झौताले समुदायलाई बैंकिङका लागि योग्य बनाउने तथा बैंकलाई लक्षित समुदायअनुसार क्षमता अभिवृद्धि गर्दै विभिन्न आयाममा सहकार्य गर्ने कार्ययोजना तय गरेको छ।

“अन्तर्राष्ट्रिय जलवायु वित्त र लक्षित उद्यमीहरूबीचको खाडल कम गर्न समुदायको यथार्थ अवस्था र बैंकिङ जोखिमको ढाँचा दुवैलाई गहिरो रूपमा बुझ्ने एउटा सुदृढ पारिस्थितिक प्रणाली आवश्यक छ,” बैंकको दिगो बैंकिङ विभागका प्रमुख श्री अर्पण पौडेलले भन्नुभयो। “यो साझेदारीले क्षमता अभिवृद्धिका प्रयासलाई वास्तविक वित्तीय समावेशीकरणमा रूपान्तरण गर्न महत्वपूर्ण योगदान पुर्‍याउनेछ।”

नेपालका अग्रणी वित्तीय संस्थामध्ये एक कुमारी बैंकले आफ्नो सुदृढ सञ्जालमार्फत यस रूपान्तरणकारी पहललाई देशव्यापी रूपमा विस्तार गर्ने जनाएको छ। हाल बैंकले आफ्ना २८६ शाखा, ३०४ एटीएम, ४० एक्सटेन्सन काउन्टर, ४१ शाखारहित बैंकिङ एकाइ तथा १,२३३ पीओएस टर्मिनलमार्फत अत्याधुनिक डिजिटल बैंकिङ सेवा प्रदान गर्दै आएको छ।

ग्राहककेन्द्रित नवीनता, पारदर्शी कार्यशैली र सुशासनका लागि परिचित कुमारी बैंक र मिर्मिरे इनिसियटिभ्सबीचको यस सहकार्यले हरित वित्त प्रवर्द्धन, दिगो आर्थिक विकास तथा स्वच्छ एवं जलवायु उत्थानशील भविष्य निर्माणमा महत्वपूर्ण योगदान पुग्ने विश्वास गरिएको छ।