एनएमबी बैंकद्वारा नागरिक एप इन्टिग्रेसनका लागि सूचना प्रविधि विभागसँग सहकार्य

काठमाडौं — डिजिटल बैंकिङलाई अझ सहज र छिटो बनाउनका लागि एनएमबी बैंकले नेपाल सरकारको सूचना प्रविधि विभाग (DoIT) सँग सम्झौता गरेको छ।

यो नयाँ सहकार्यपछि अब एनएमबी बैंकका ग्राहकहरूले नागरिक एप मार्फत अनलाइन बैंकिङ फारामहरू सजिलै भर्न सक्नेछन्। यसले गर्दा आफ्ना व्यक्तिगत विवरणहरू बारम्बार हातैले टाइप गरिरहनु पर्ने झन्झट हट्ने, कागजी काम कम हुने र बैंकको सेवा अझ सहज तथा छिटो हुने अपेक्षा गरिएको छ।

ग्राहकहरूको गोप्य जानकारीको सुरक्षामा पूर्ण ध्यान दिँदै, ग्राहकहरूले आफैंले आफ्नो नागरिक एपबाट विवरण हेर्न अनुमति नदिएसम्म बैंकले ती विवरण हेर्न वा प्रयोग गर्न पाउने छैन। साथै, सबै जानकारी जुन कामका लागि मागिएको हो, त्यसै प्रयोजनका लागि मात्र प्रयोग गरिनेछ।

देशको बढ्दो डिजिटल सार्वजनिक पूर्वाधार (Digital Public Infrastructure – DPI) को उपयोग गर्दै नेपाली नागरिकहरूका लागि बैंकिङ सेवालाई अझ सुरक्षित, सरल र झन्झटरहित बनाउने एनएमबी बैंकको प्रयासमा यो एक महत्वपूर्ण कदमका रूपमा हेरिएको छ।