न्यूजील्यान्डको उत्तरी आइल्यान्डमा पहिरो, आनन्द यात्रामा गएका मानिस माटोमुनि, न्यूजील्यान्ड स्तब्ध: खोजी कार्य तीव्र

वेलिङटन | न्यूजील्यान्डको उत्तरी आइल्यान्डस्थित माउन्ट माउगानी पर्वतको आधार शिविरमा आएको भीषण पहिरोले देश नै स्तब्ध बनेको छ। स्थानीय समयअनुसार बिहान ९:३० बजे अचानक खसेको पहिरोले क्याम्पिङ क्षेत्रलाई पूरै तहसनहस बनाएको छ।

पहिरोले क्याम्पर भ्यान, कार, टेन्ट, शौचालय र नुहाउने स्थल समेत बगाउँदा घटनास्थल युद्धभूमि जस्तै बनेको छ। आकस्मिक व्यवस्थापन मन्त्री मार्क मिचेलका अनुसार बेपत्ता हुनेहरूमा कम्तीमा एक जना बालक समेत रहेका छन्, जसले घटनालाई अझ हृदयविदारक बनाएको छ।

उद्धार टोलीहरू जीवनको आशामा माटो खोतलिरहेका छन्, तर समाचार तयार पार्दासम्म कुनै पनि व्यक्तिको जीवित उद्धार हुन सकेको छैन। समय बित्दै जाँदा चिन्ता झन् बढ्दै गएको छ।

प्राकृतिक विपत्तिले फेरि एकपटक मानव जीवन कति असुरक्षित छ भन्ने कठोर सन्देश दिएको छ।