सादा पोसाकका प्रहरी हौँ भन्दै क्लिनिकबाट रकम असुल्ने दुई जना पक्राउ

काठमाडौँ, सादा पोसाकका प्रहरी हौँ भन्दै डर, त्रास र धाक-धम्की दिएर रकम असुल गरेको अभियोगमा दुई जनालाई प्रहरीले पक्राउ गरेको छ। पक्राउ पर्नेहरूमा चन्द्रागिरि नगरपालिका–२ बसुन्डोल बस्ने ३१ वर्षीय रोशन सुर्खेती र २६ वर्षीय सञ्जय बिसुङ्खे रहेका छन्।

उनीहरूले चन्द्रागिरि नगरपालिका–७ थानकोटस्थित एक स्वास्थ्य क्लिनिकमा बिहीबार साँझ प्रवेश गरी मेडिकल अनुगमन गर्न हिँडेका सादा पोसाकका प्रहरी भएको दाबी गरेका थिए। त्यसपछि सञ्चालकलाई डर-त्रास देखाई औषधि पसलको काउन्टरबाट नगद समेत लिएर उनीहरू फरार भएका थिए।

घटनाको खबर प्राप्त हुनासाथ जिल्ला प्रहरी परिसर काठमाडौँबाट खटिएको प्रहरी टोलीले छानबिन अघि बढाउँदै उनीहरूलाई सोमबार नियन्त्रणमा लिएको हो। पक्राउ परेका दुवै जनामाथि आपराधिक लाभ (एक्सटर्सन) सम्बन्धी कसुरमा जिल्ला अदालत काठमाडौँबाट ४ दिनको म्याद थप गरी प्रहरीले आवश्यक अनुसन्धान गरिरहेको छ।