ललितपुरमा दिउँसै चोरीको आतंक, एकै दिन ४३ लाखभन्दा बढीको धनमाल गायब

ललितपुर — ललितपुरको महालक्ष्मी नगरपालिका–१ क्षेत्रमा सोमबार दिउँसो भएका लगातार दुई चोरीका घटनाले स्थानीयबासीलाई स्तब्ध बनाएको छ। एकै दिन, एउटै वडाका फरक–फरक स्थानबाट ४३ लाख रुपैयाँभन्दा बढीको धनमाल चोरी भएको छ।

भैरब टोलमा ४ लाखको चोरी
भैरब टोलमा डेरा गरी बस्दै आएका महोत्तरी घर भएका ४४ वर्षीय जानेन्द्रलाल कर्णको कोठाबाट सुनका विभिन्न गरगहना र नगद चोरी भएको छ। चोरी भएको धनमालको मूल्य करिब ४ लाख ४ हजार रुपैयाँ बराबर रहेको जनाइएको छ।

कृष्ण मन्दिर चोकमा झण्डै ४० लाखको चोरी
यसैगरी कृष्ण मन्दिर चोकमा डेरा गरी बस्ने अर्घाखाँची घर भएका बाबुराम पाण्डेको कोठाबाट सुन तथा चाँदीका गरगहना र नगद चोरी भएको छ। प्रारम्भिक विवरणअनुसार चोरी भएको धनमालको मूल्य करिब ३९ लाख ४७ हजार रुपैयाँ बराबर रहेको छ।

संगठित गिरोहको आशंका
एकै दिन, एउटै वडामा यति ठूलो परिमाणमा चोरी हुनु संगठित चोरी गिरोह सक्रिय भएको आशंका गरिएको छ।

प्रहरी अनुसन्धानमा
प्रहरीले चोरीमा संलग्न हाल फरार व्यक्तिहरूको खोजी तीव्र बनाएको छ। घटनासम्बन्धी थप अनुसन्धान भइरहेको जनाएको छ।

दिउँसै भएका यस्ता घटनाले ललितपुरको सुरक्षा व्यवस्थामाथि गम्भीर प्रश्न खडा गरेको छ।