एमाले नेतृत्व चयनमा अप्रत्याशित ब्रेक, प्राविधिक समस्याले मतदान स्थगित

काठमाडौं, पुस १ — नेकपा एमालेको केन्द्रीय नेतृत्व चयनका लागि आज हुने भनिएको मतदान अन्तिम समयमा स्थगित गरिएको छ। प्रतिनिधिहरू मतदानका लागि लाइनमा उभिइसकेको अवस्थामा मतदान रोकिँदा हलमा अचानक अन्योलको अवस्था सिर्जना भएको थियो।

निवर्तमान महासचिव शंकर पोखरेलका अनुसार अब मतदान भोलि बिहान ८ बजेदेखि सुरु हुनेछ।

“विद्युतीय भोटिङ मेसिनमा नाम प्रविष्ट गर्न अपेक्षाभन्दा बढी समय लागेकाले मतदान ढिलाइ भयो,” पोखरेलले जानकारी दिनुभयो।

साँझ ७ बजेदेखि मतदान सुरु हुने तयारी भए पनि प्राविधिक कारणले समयमै प्रक्रिया अघि बढ्न सकेन। चिसो बढ्दै जानु, रात पर्नु र प्रतिनिधिहरू लामो समय पर्खनु परेपछि अन्ततः आजका सबै निर्वाचन कार्यक्रम स्थगित गर्ने निर्णय गरिएको हो।

निर्वाचन आयोगको निर्णय
एमाले निर्वाचन आयोगले भोलि बिहान ८ बजेसम्मका लागि मतदानसहित सबै निर्वाचन कार्यक्रम स्थगित गरिएको जानकारी दिएको छ। आवश्यक तयारी पूरा गरेर भोलि मतदान प्रक्रिया सुचारु गरिने जनाइएको छ।

नेतृत्व चयनप्रति चासो उच्च
एमालेको केन्द्रीय नेतृत्व चयनलाई लिएर देशभर चासो बढिरहेका बेला मतदान स्थगित भएपछि प्रतिनिधि र समर्थकहरूबीच चर्चा थप तातेको छ।