भोजपुर र सुनसरी–१ मा प्रलोपाबाट सुदन किराँती उम्मेदवार सिफारिस

काठमाडौँ । प्रगतिशील लोकतान्त्रिक पार्टी (प्रलोपा) ले आगामी निर्वाचनका लागि अध्यक्ष परिषद्का सदस्य सुदन किराँतीलाई भोजपुर र सुनसरी–१ बाट उम्मेदवार सिफारिस गरेको छ ।

पार्टी स्रोतका अनुसार सुनसरी–१ निर्वाचन क्षेत्रबाट किराँतीको नाम एकल सिफारिस गरिएको छ भने एक मात्र निर्वाचन क्षेत्र रहेको भोजपुरबाट किराँतीसँगै हेमन्त राईको नाम पनि सिफारिस गरिएको छ ।

भोजपुर राजनीतिक रूपमा सुदन किराँतीको बलियो आधार क्षेत्र मानिँदै आएको छ । उनी २०६४, २०७४ र २०७९ सालको निर्वाचनमा भोजपुरबाट लगातार विजयी हुँदै आएका छन्, जसका कारण पार्टीभित्र र बाहिर उनको उम्मेदवारीलाई अर्थपूर्ण रूपमा हेरिएको छ ।

प्रलोपाले अनुभवी र जनाधार भएको नेतृत्वलाई अघि सार्दै निर्वाचनमा प्रभावकारी उपस्थिति जनाउने रणनीति लिएको बताइएको छ । किराँतीको सिफारिससँगै भोजपुर र सुनसरी–१ को राजनीतिक सरगर्मी थप बढ्ने संकेत देखिएको छ ।