देशैभरि लागूऔषधविरुद्ध प्रहरीको अभियान: एकैदिन विभिन्न जिल्लाबाट १५ जना कारोबारी पक्राउ

काठमाडौं, १७ कात्तिक । देशका विभिन्न स्थानमा लागूऔषधको कारोबार तथा तस्करीमा संलग्न १५ जनालाई प्रहरीले पक्राउ गरेको छ। विभिन्न जिल्लामा खटिएको प्रहरी टोलीले चेकजाँचका क्रममा गाँजा, खैरो हेरोइन (ब्राउनसुगर), पोलेन र नियन्त्रित लागूऔषधसहित उनीहरूलाई पक्राउ गरेको हो। सोमबार मात्रै देशका विभिन्न भागबाट ठूलो परिमाणमा लागूऔषधसहित कारोबारीहरू फन्दामा परेका हुन्।

ललितपुरको गोदावरी-३ बाडेगाउँबाट महालक्ष्मी-१४ का २६ वर्षीय यमराज रम्तेल १ किलो ५ सय ग्राम गाँजासहित पक्राउ परेका छन् भने सोही ठाउँबाट ३८ वर्षीय ईश्वर खत्री १० ग्राम पोलेनसहित पक्राउ परेका छन्। यता सिन्धुलीको सुनकोशी गाउँपालिका-१ बाट धनुषाका २९ वर्षीय मन्जित योन्जनलाई ९० ग्राम १ सय ६० मिलिग्राम खैरो हेरोइनसहित मोटरसाइकलसहित नियन्त्रणमा लिइएको छ।

त्यसैगरी झापाको शिवसताक्षी र मेचीनगर, सुनसरीको कोशी गाउँपालिका तथा मोरङको पथरी शनिश्चरे क्षेत्रबाट ब्राउनसुगरसहित ६ जना पक्राउ परेका छन्। झापामा राजेन्द्र गणेश र मेहबुब आलम मिया, सुनसरीमा निश्मा राईसहित दुई जना तथा मोरङमा रुपेस सार्की स्कुटरसहित पक्राउ परेका हुन्। उनीहरूको साथबाट ग्रामका हिसाबले ब्राउनसुगरजस्तो देखिने लागूऔषध बरामद गरिएको छ।

यता चितवन र तनहुँमा गरिएको चेकजाँचका क्रममा ट्रामाडोल र प्रतिबन्धित एम्पुलसहित चार जना पक्राउ परेका छन्। चितवनको लोथरबाट ट्रामाडोल २ हजार ३ सय ९५ ट्याब्लेटसहित सन्तोष कुमार राई, तनहुँको आँबुखैरेनीबाट ६० ट्याब्लेट ट्रामाडोलसहित समुन्द्र विमली र म्याग्देबाट फेनारगन, डाइजेपाम र बुप्रेनोर्फिनसहित सुरेश परियार पक्राउ परेका छन्। त्यस्तै पर्साको वीरगंजबाट ७ सय ९० मिलिग्राम ब्राउनसुगरसहित सुजित यादव र कैलालीको धनगढीबाट ९० मिलिग्राम ब्राउनसुगरसहित ज्ञानेन्द्र नेपाली र रोहित कुमाल पक्राउ परेका छन्।

पक्राउ परेका सबै अभियुक्तहरूमाथि सम्बन्धित प्रहरी कार्यालयहरूबाट लागूऔषधसम्बन्धी कसूरमा आवश्यक अनुसन्धान भइरहेको नेपाल प्रहरी प्रधान कार्यालयले जनाएको छ।