युके, क्यानडादेखि सिंगापुर पठाउने नाममा करोडौँ ठग्ने ५ ठगीका नाइके काठमाडौंबाट पक्राउ

काठमाडौं, १७ कात्तिक । वैदेशिक रोजगारीका क्रममा विभिन्न देशहरूमा आकर्षक तलबको प्रलोभन देखाई रकम ठगी गरेको अभियोगमा पाँच जनालाई प्रहरीले पक्राउ गरेको छ। पक्राउ पर्नेहरूमा धादिङ घर भई हाल काठमाडौं महानगरपालिका-१६ बस्ने २० वर्षीया आशिका सिम्खडा, उदयपुर घर भई काठमाडौं-३२ बस्ने ४६ वर्षीय बिष्णु खत्री, सिन्धुली घर भई काठमाडौं-१ बस्ने ३५ वर्षीय दिनेश पाख्रेन तामाङ, गोरखा घर भई काठमाडौं टोखा नगरपालिका-६ बस्ने ३८ वर्षीय राजेश बराम र काठमाडौं गोकर्णेश्वर नगरपालिका-८ बस्ने ४८ वर्षीय छिरिङ शेर्पा रहेका छन्।

पक्राउ परेकामध्ये आशिकाले युके पठाइदिन्छु भन्दै १ जना पीडितबाट ७ लाख ५० हजार रूपैयाँ, बिष्णुले माल्टा पठाइदिन्छु भन्दै १ जना पीडितबाट ६ लाख रूपैयाँ र दिनेशले युएई पठाइदिन्छु भन्दै १ जना पीडितबाट २ लाख रूपैयाँ ठगी गरेका थिए। त्यसैगरी राजेशले सिंगापुर पठाइदिन्छु भन्दै २ जना पीडितहरूबाट १५ लाख ५० हजार रूपैयाँ र छिरिङले क्यानडा पठाइदिन्छु भन्दै २ जना पीडितहरूबाट ७ लाख ४० हजार रूपैयाँ लिई रकम असुल गरेर सम्पर्कविहीन भएका थिए।

पीडितहरूले दिएको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले आशिकालाई काठमाडौं-१६ बाट बिहीबार, बिष्णुलाई काठमाडौं-३२ र दिनेशलाई काठमाडौं-१२ बाट शुक्रबार, राजेशलाई काठमाडौं-६ बाट शनिबार तथा छिरिङलाई काठमाडौं गोकर्णेश्वर-३ बाट आइतबार नियन्त्रणमा लिएको हो।

पक्राउ परेका पाँचै जनालाई आवश्यक अनुसन्धान तथा कानुन बमोजिम थप कारबाहीका लागि वैदेशिक रोजगार विभाग ताहाचल, काठमाडौं पठाइएको जानकारी नेपाल प्रहरी प्रधान कार्यालयले जनाएको छ।