होस्टलमा कुटपिटपछि २२ वर्षीय युवकको मृत्यु, १८ वर्षीय किशोर पक्राउ

काठमाडौं, ५ भदौ काठमाडौं महानगरपालिका–१०, शंखमुलस्थित भ्याली ब्वाईज होस्टलमा भएको कुटपिट तथा धारिलो हतियार प्रहारबाट २२ वर्षीय युवकको मृत्यु भएको छ।

दाङ, घोराही उपमहानगरपालिका–१७ घर भई उक्त होस्टलमा बस्दै आएका बसन्त कालाथोकीको हत्या गरेको अभियोगमा प्रहरीले सोही होस्टलमा बस्ने बारा, कलैया उपमहानगरपालिका–३ घर भएका १८ वर्षीय किशोरलाई शुक्रबार दिउँसो पक्राउ गरेको छ।

प्रहरीका अनुसार शुक्रबार बिहान होस्टलमा १८ वर्षीय किशोर र २० वर्षीय प्रमित पटेलले बसन्तमाथि कुटपिट गर्नुका साथै धारिलो हतियार प्रहार गरेका थिए। गम्भीर घाइते बसन्तको मीनभवनस्थित निजामती कर्मचारी अस्पतालमा उपचारका क्रममा मृत्यु भएको हो।

घटनाको खबर प्राप्त हुनासाथ प्रहरी वृत्त नयाँ बानेश्वरबाट खटिएको टोलीले घटनामा संलग्न रहेको अभियोगमा १८ वर्षीय किशोरलाई पक्राउ गरेको हो।

घटनाबारे थप अनुसन्धानका लागि प्रहरीले ५ जनालाई नियन्त्रणमा लिएको जनाएको छ। घटनापछि फरार रहेका प्रमित पटेलको खोजी भइरहेको प्रहरीले जनाएको छ।

घटनासम्बन्धमा प्रहरीले थप अनुसन्धान गरिरहेको छ।