ग्रीसदेखि बेलायतसम्म पठाइदिन्छु भन्दै लाखौँ ठगी, ४ जना पक्राउ

काठमाडौं । आकर्षक तलबको प्रलोभन देखाउँदै ग्रीस, जर्मनी, यूएई र बेलायत पठाइदिन्छु भन्दै सर्वसाधारणबाट लाखौँ रुपैयाँ ठगी गरेको आरोपमा प्रहरीले चार जनालाई पक्राउ गरेको छ।

पक्राउ पर्नेमा एम.डी. खुर्सिद आलम नेपाली, भुप नारायण चौधरी, बसन्त कुमार सिंह र रस्तमान राई रहेका छन्।

प्रहरीका अनुसार एम.डी.ले ग्रीस पठाइदिन्छु भन्दै ८ लाख, भुप नारायणले जर्मनी पठाइदिन्छु भन्दै ३ जनाबाट ३२ लाख, बसन्तले यूएई पठाइदिन्छु भन्दै ११ जनाबाट २१ लाख र रस्तमानले बेलायत पठाइदिन्छु भन्दै ४ लाख रुपैयाँ लिएको उजुरी परेको थियो।

उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरीले उनीहरूलाई काठमाडौं र ललितपुरका विभिन्न स्थानबाट पक्राउ गरेको हो।

पक्राउ परेकाहरूलाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।

वैदेशिक रोजगारीमा जानुअघि म्यानपावर, एजेन्ट र कागजातको आधिकारिकता अनिवार्य जाँच गर्नुहोस्।