क्रोएसिया पठाइदिने भन्दै रु. ८ लाख ५० हजार ठगी, एक पक्राउ

काठमाडौं, वैदेशिक रोजगारीका नाममा क्रोएसिया पठाइदिने प्रलोभन देखाएर रु. ८ लाख ५० हजार ठगी गरेको आरोपमा प्रहरीले एक जनालाई पक्राउ गरेको छ।

पक्राउ पर्नेमा कञ्चनपुर भीमदत्त नगरपालिका–११ घर भई हाल काठमाडौं महानगरपालिका–३१ बस्दै आएका ४४ वर्षीय नवराज भट्ट रहेका छन्।

प्रहरीका अनुसार नवराजले आकर्षक तलबमा क्रोएसिया पठाइदिने आश्वासन दिई एक जना पीडितबाट रु. ८ लाख ५० हजार रकम लिएपछि सम्पर्कविहीन भएका थिए। पीडितको उजुरीका आधारमा काठमाडौं उपत्यका अपराध अनुसन्धान कार्यालय, टेकुको टोलीले उनलाई काठमाडौं महानगरपालिका–३१ बाट पक्राउ गरेको हो।

पक्राउ परेका भट्टलाई थप अनुसन्धान तथा कानुनी कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।