भ्रामक सूचना फैलाएको आरोपमा युट्युब सञ्चालक पक्राउ, साइबर ब्यूरोको कारबाही

काठमाडौं, सामाजिक सञ्जालमार्फत भ्रामक सूचना प्रवाह आरोपमा प्रहरीले एक व्यक्तिलाई पक्राउ गरेको छ।

नेपाल प्रहरीको साइबर ब्यूरोका अनुसार अर्घाखाँचीको सन्धिखर्क नगरपालिका–९ घर भई हाल रुपन्देहीको बुटवल उपमहानगरपालिका–१३ बस्दै आएका ३९ वर्षीय जनक भुसाल शनिबार पक्राउ परेका हुन्।

प्रहरीका अनुसार उनले ‘नेपाली खबर टिभी’ नामक युट्युब च्यानलमार्फत राज्यको विद्यमान परिस्थितिलाई असर पर्ने किसिमका भ्रामक सामग्री तयार गरी प्रसारण गरेको, अफवाह फैलाएको तथा जातीय र धार्मिक सद्भावमा खलल पुग्ने, घृणा वा द्वेष फैलाउने तथा कानुनले निषेध गरेका सामग्री प्रकाशन एवं प्रसारण गरेको आरोप छ।

साइबर ब्यूरोबाट खटिएको प्रहरी टोलीले इलाका प्रहरी कार्यालय बुटवलको सहयोगमा उनलाई बुटवलबाट पक्राउ गरेको हो। उनीविरुद्ध विद्युतीय कारोबार ऐन, २०६३ अन्तर्गत जिल्ला अदालत काठमाडौंबाट सात दिनको म्याद थप अनुमति लिई थप अनुसन्धान भइरहेको प्रहरीले जनाएको छ।

नेपाल प्रहरीले सामाजिक सञ्जालको जिम्मेवार प्रयोग गर्न तथा अपुष्ट, भ्रामक वा कानुनविपरीत सामग्री प्रकाशन वा प्रसारण नगर्न सबैमा आग्रह गरेको छ।