पानी तान्ने मोटरबाट करेन्ट लाग्दा रौतहटका एक पुरुषको मृत्यु

काठमाडौं | श्रावण ११, २०८३ रौतहटको चन्द्रपुर नगरपालिका–२ वनटोलमा विद्युतीय मोटरबाट करेन्ट लाग्दा ३३ वर्षीय मनबहादुर बम्जनको मृत्यु भएको छ।

प्रहरीका अनुसार शनिबार बिहान आफ्नै घरनजिक धारामा जडित पानी तान्ने विद्युतीय मोटर सञ्चालन गर्ने क्रममा उनलाई करेन्ट लागेको थियो। गम्भीर घाइते भएका बम्जनलाई तत्काल चन्द्रपुर सरकारी अस्पताल लगिएको भए पनि उपचारकै क्रममा चिकित्सकले मृत घोषणा गरेका हुन्।

घटनाबारे आवश्यक अनुसन्धान भइरहेको प्रहरीले जनाएको छ। साथै, वर्षायाममा विद्युतीय उपकरण प्रयोग गर्दा विशेष सावधानी अपनाउन पनि सम्बन्धित निकायले आग्रह गर्दै आएको छ।