भक्तपुरबाट चोरी भएको स्कुटर ३ दिनमै बरामद, चोरीमा संलग्न व्यक्ति पक्राउ

काठमाडौं । भक्तपुरबाट चोरी भएको स्कुटर प्रहरीले चोरी भएको तीन दिनमै फेला पारी चोरीमा संलग्न एक जनालाई पक्राउ गरेको छ।

पक्राउ पर्नेमा काठमाडौंको गोकर्णेश्वर नगरपालिका बस्ने, सिन्धुली मरिण गाउँपालिका–४ घर भएका ३१ वर्षीय माइते सिं स्याङ्तान रहेका छन्।

प्रहरीका अनुसार साउन १ गते राति भक्तपुरको सूर्यविनायक नगरपालिका–८ चुकुपुलबाट बा.प्र.०२–०६४ प ६६६८ नम्बरको स्कुटर चोरी भएको भन्दै पीडितले उजुरी दिएका थिए।

उजुरीपछि जिल्ला प्रहरी परिसर भक्तपुरबाट खटिएको टोलीले अनुसन्धान तथा खोजतलास गर्ने क्रममा साउन ३ गते सूर्यविनायक नगरपालिका–१ सल्लाघारीबाट चोरी भएको स्कुटरसहित स्याङ्तानलाई पक्राउ गरेको हो।

घटनाबारे थप अनुसन्धान भइरहेको जिल्ला प्रहरी परिसर भक्तपुरले जनाएको छ।