१३ वर्षीया बालिकामाथि जबरजस्ती करणी गरेको आरोपमा एक युवक पक्राउ, फरार प्रतिवादी पनि नियन्त्रणमा

काठमाडौं, पाल्पामा १३ वर्षीया बालिकामाथि जबरजस्ती करणी गरेको आरोपमा एक युवक पक्राउ परेका छन् भने कञ्चनपुरमा जबरजस्ती करणी मुद्दाका फरार प्रतिवादीलाई पनि प्रहरीले नियन्त्रणमा लिएको छ।

प्रहरीका अनुसार पाल्पाको रामपुर नगरपालिका–४ खोप्टार बस्ने तथा नवलपरासी (पूर्व) बौदीकाली गाउँपालिका–३ नयाँछाप घर भएका २२ वर्षीय आकाश पुलामी मगरलाई १३ वर्षीया बालिकामाथि जबरजस्ती करणी गरेको भन्ने उजुरीका आधारमा इलाका प्रहरी कार्यालय रामपुरबाट खटिएको टोलीले शनिबार राति पक्राउ गरेको हो। घटनाबारे थप अनुसन्धान भइरहेको प्रहरीले जनाएको छ।

यस्तै, कञ्चनपुरको बेदकोट नगरपालिका–४ बगुनका ३९ वर्षीय देवराज भट्टलाई जबरजस्ती करणी मुद्दामा फरार प्रतिवादीका रूपमा प्रहरीले पक्राउ गरेको छ। जिल्ला अदालत कञ्चनपुरको २०७१ मंसिर २४ गतेको फैसलाअनुसार उक्त मुद्दामा १ वर्ष १० महिना ५ दिन कैद सजाय ठहर भएपछि फरार रहेका उनलाई अस्थायी प्रहरी पोस्ट दैजीबाट खटिएको टोलीले शनिबार नियन्त्रणमा लिएको प्रहरीले जनाएको छ।

दुवै घटनाबारे प्रहरीले आवश्यक कानुनी प्रक्रिया र थप अनुसन्धान अघि बढाइरहेको जनाएको छ।