चन्द्रनहरमा नुहाउने क्रममा ११ वर्षीय बालकको दुःखद निधन

सप्तरी,  सप्तरीको कञ्चनरूप नगरपालिका–८ मा नुहाउने क्रममा चन्द्रनहरमा डुबेर एक ११ वर्षीय बालकको मृत्यु भएको छ।

मृत्यु हुनेमा स्थानीय रबिन्द्र प्रमाणीका छोरा पंकज प्रमाणी रहेका छन्। आइतबार बेलुकी नुहाउने क्रममा उनी नहरमा डुबेर बेपत्ता भएको जानकारी प्राप्त भएपछि इलाका प्रहरी कार्यालय कञ्चनपुरबाट खटिएको प्रहरी टोलीले तत्काल खोजी अभियान सञ्चालन गरेको थियो।

निरन्तर खोजीपछि सोमबार बिहान पंकजको शव चन्द्रनहरबाट फेला परेको प्रहरीले जनाएको छ।

घटनाबारे प्रहरीले आवश्यक अनुसन्धान अघि बढाएको छ।

सावधानी अपनाऔँ: वर्षायाममा नदी, नहर, पोखरी तथा अन्य जलाशयमा नुहाउँदा विशेष सतर्कता अपनाऔँ। बालबालिकालाई अभिभावकको निगरानीबिना पानी नजिक जान नदिनु नै यस्ता दुःखद घटनाबाट जोगिने सबैभन्दा प्रभावकारी उपाय हो।