नेपाल आयल निगमको नयाँ नेतृत्व दौडमा ६ प्रतिस्पर्धी! कार्यकारी निर्देशकका लागि सर्टलिस्ट सार्वजनिक

काठमाडौं । नेपाल आयल निगम लिमिटेडको रिक्त कार्यकारी निर्देशक पदका लागि प्रतिस्पर्धा गरिरहेका उम्मेदवारमध्ये ६ जनाको नाम सर्टलिस्ट गरिएको छ। उद्योग, वाणिज्य तथा आपूर्ति मन्त्रालयले प्राप्त आवेदनहरूको अध्ययन तथा मूल्याङ्कनपछि योग्य उम्मेदवारहरूको सङ्क्षिप्त सूची सार्वजनिक गरेको हो।

सर्टलिस्टमा छविराज पोख्रेल, कौशल केसी, सञ्जिवकुमार देव, सीए नागेन्द्र साह, सरोजकुमार शर्मा र दिपेन्द्रकुमार देव परेका छन्।

मन्त्रालयका अनुसार अब यी उम्मेदवारहरूको कार्ययोजना प्रस्तुतीकरण (Presentation) र अन्तर्वार्ता हुनेछ। त्यसको मिति र स्थान भने पछि सार्वजनिक गरिनेछ।

यसअघि मन्त्रालयले असार २ गतेदेखि २२ गतेसम्म खुला प्रतिस्पर्धात्मक प्रणालीमार्फत आवेदन मागेको थियो।

अन्तर्वार्ता र कार्ययोजना प्रस्तुतीकरणको मूल्याङ्कनपछि छनोट समितिले उत्कृष्ट तीन जनाको नाम मन्त्रिपरिषद्मा सिफारिस गर्नेछ। सोही सिफारिसका आधारमा सरकारले आगामी चार वर्षका लागि नेपाल आयल निगमको नयाँ कार्यकारी निर्देशक नियुक्त गर्नेछ।