अमेरिका पठाइदिने भन्दै ३ लाख ठगी गरेको आरोपमा एक जना पक्राउ

काठमाडौं, असार २६। अमेरिका पठाइदिने भन्दै वैदेशिक रोजगारीको प्रलोभन देखाएर रकम ठगी गरेको आरोपमा एक जनालाई प्रहरीले पक्राउ गरेको छ।
पक्राउ पर्नेमा कपिलवस्तुको बाणगंगा नगरपालिका–८ मा बसोबास गर्दै आएका पाल्पाको रैनादेवी छहरा गाउँपालिका–१ स्थायी घर भएका ३५ वर्षीय माधव अर्याल रहेका छन्।
काठमाडौं उपत्यका अपराध अनुसन्धान कार्यालय, टेकुले दिएको जानकारीअनुसार अर्यालले एक जना व्यक्तिलाई अमेरिका पठाइदिने आश्वासन दिई ३ लाख रुपैयाँ लिएको र त्यसपछि सम्पर्कविहीन भएको भन्ने उजुरीका आधारमा अनुसन्धान अघि बढाइएको थियो।
अनुसन्धानका क्रममा उनलाई काठमाडौं महानगरपालिका–१३ क्षेत्रबाट पक्राउ गरिएको प्रहरीले जनाएको छ।
पक्राउ परेका अर्याललाई थप अनुसन्धान तथा कानुनी कारबाहीका लागि जिल्ला प्रहरी परिसर काठमाडौं पठाइएको प्रहरीले जनाएको छ।