टर्की र बेलायत पठाइदिने सपना देखाएर लाखौं ठगी, दुई जना पक्राउ

काठमाडौं, वैदेशिक रोजगारीको आकर्षक अवसर देखाएर सर्वसाधारणबाट लाखौं रुपैयाँ असुली सम्पर्कविहीन हुने दुई जना व्यक्तिलाई प्रहरीले पक्राउ गरेको छ।

प्रहरीका अनुसार टर्की र बेलायत पठाइदिने भन्दै पीडितहरूबाट रकम उठाएर फरार भएका ४९ वर्षीय सुरेश गिरी र ७० वर्षीय बिर बहादुर श्रेष्ठलाई सोमबार पक्राउ गरिएको हो।

सुरेश गिरीले टर्की पठाइदिने आश्वासन दिएर एक पीडितबाट १ लाख ९० हजार रुपैयाँ र बिर बहादुर श्रेष्ठले बेलायत पठाइदिने भन्दै अर्को पीडितबाट २ लाख रुपैयाँ लिएको आरोप छ। रकम लिएपछि दुवै जना सम्पर्कविहीन भएको भन्दै पीडितहरूले उजुरी दिएका थिए।

उक्त उजुरीका आधारमा काठमाडौं उपत्यका अपराध अनुसन्धान कार्यालय टेकुको टोलीले काठमाडौं र ललितपुरबाट उनीहरूलाई पक्राउ गरेको हो। पक्राउ परेका दुवै जनालाई थप अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।