अमेरिका पठाइदिने भन्दै ३८ लाख ५० हजार रुपैयाँ ठगी गर्ने महिला पक्राउ

काठमाडौं, २७ जेठ — वैदेशिक रोजगारीका नाममा अमेरिका पठाइदिने प्रलोभन देखाएर ३८ लाख ५० हजार रुपैयाँ ठगी गरेको आरोपमा एक महिलालाई प्रहरीले पक्राउ गरेको छ।

पक्राउ पर्नेमा रोल्पा घर भई काठमाडौं चन्द्रागिरी नगरपालिका–४ बस्ने ५४ वर्षीया निर्मला कुमारी श्रेष्ठ रहेकी छन्।

प्रहरीका अनुसार उनले एक जना पीडितलाई आकर्षक तलबसहित अमेरिका पठाइदिने आश्वासन दिई ३८ लाख ५० हजार रुपैयाँ लिएको र त्यसपछि सम्पर्कविहीन भएको आरोप छ।

पीडितको उजुरीका आधारमा काठमाडौं उपत्यका अपराध अनुसन्धान कार्यालय टेकुले अनुसन्धान अघि बढाई निर्मला कुमारी श्रेष्ठलाई काठमाडौं महानगरपालिका–१२ टेकुबाट पक्राउ गरेको हो।

पक्राउ परेकी श्रेष्ठलाई थप अनुसन्धान तथा आवश्यक कानुनी कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।

प्रहरीले वैदेशिक रोजगारीका अवसरबारे जानकारी लिँदा आधिकारिक निकाय तथा स्वीकृत म्यानपावर कम्पनीमार्फत मात्र प्रक्रिया अघि बढाउन सर्वसाधारणलाई आग्रह गरेको छ।