सप्तरीमा घरमा आगलागी, लाखौंको धनमाल जलेर नष्ट

सप्तरी, २७ जेठ — सप्तरीको कञ्चनरूप नगरपालिका–८ बेरियर चोक क्षेत्रमा बुधबार बिहान भएको आगलागीमा दुईवटा घरमा क्षति पुगेको छ।

प्रहरीका अनुसार मोरङको विराटनगर महानगरपालिका–११ जनपत टोल निवासी पिन्टु साहका दुई वटा घरमा आगलागी हुँदा करिब ३ लाख रुपैयाँ बराबरको धनमाल जलेर नष्ट भएको छ।

आगलागी भएको जानकारी प्राप्त हुनासाथ प्रहरी, स्थानीय बासिन्दा तथा दमकलको टोली घटनास्थलमा पुगेर आगो नियन्त्रणमा लिएको थियो। समयमै आगो नियन्त्रणमा लिइएकाले थप क्षति हुनबाट जोगिएको बताइएको छ।

हाल आगलागीको कारण खुल्न बाँकी रहेको र घटनाबारे थप अनुसन्धान भइरहेको प्रहरीले जनाएको छ।

गर्मीयाम र विद्युतीय समस्याका कारण आगलागीका घटना बढ्न सक्ने भएकाले घर तथा व्यवसायिक स्थलमा आगो र विद्युत सुरक्षाप्रति विशेष सतर्कता अपनाउन आग्रह गरिएको छ।