काठमाडौं र सिन्धुलीमा लागूऔषध विरुद्ध प्रहरीको ठूलो कारबाही, दुई जना पक्राउ

काठमाडौं, २७ जेठ — लागूऔषध नियन्त्रण अभियानलाई तीव्र बनाइरहेको प्रहरीले काठमाडौं र सिन्धुलीबाट खैरो हेरोइनसहित दुई जनालाई पक्राउ गरेको छ।

काठमाडौं महानगरपालिका–२६ कपुरधारा स्थित सप्तकन्या गल्लीबाट सुनसरी दुहवी नगरपालिका–८ घर भएका २५ वर्षीय टंकनाथ निरौला (दिपक) लाई करिब १६ ग्राम ३ सय मिलिग्राम खैरो हेरोइनजस्तो पदार्थ सहित पक्राउ गरिएको प्रहरीले जनाएको छ। प्रहरी वृत्त लैनचौरको टोलीले विशेष सूचनाका आधारमा उनलाई नियन्त्रणमा लिएको हो।

त्यसैगरी सिन्धुलीको कमलामाई नगरपालिका–९ भिमान क्षेत्रमा २४ वर्षीय सुमन श्रेष्ठ पक्राउ परेका छन्। धरानबाट काठमाडौंतर्फ आउँदै गरेको बा.४ ख ८०१ नम्बरको हायस मा गरिएको जाँचका क्रममा उनको साथबाट २ सय मिलिग्राम खैरो हेरोइनजस्तो पदार्थ बरामद भएको प्रहरीले जनाएको छ।

प्रहरीका अनुसार दुवै घटनामा बरामद लागूऔषधको स्रोत, ओसारपसार सञ्जाल तथा संलग्न अन्य व्यक्तिबारे थप अनुसन्धान भइरहेको छ।

पछिल्लो समय लागूऔषध कारोबार र ओसारपसार विरुद्ध सुरक्षा निकायले देशभर निगरानी र कारबाहीलाई थप कडा बनाएको छ।