विराटनगरमा जुवातास खेलिरहेको अवस्थामा १२ जना पक्राउ, नगद २.५७ लाख बरामद

मोरङ, विराटनगर महानगरपालिकामा जुवातास खेलिरहेको अवस्थामा १२ जनालाई प्रहरीले पक्राउ गरेको छ। पक्राउ परेकाहरूबाट नगद रकम, तासका बुक तथा मोबाइल फोन समेत बरामद गरिएको प्रहरीले जनाएको छ।

जिल्ला प्रहरी कार्यालय मोरङका अनुसार विराटनगर महानगरपालिका–११ जनपथटोलस्थित महेश अग्रवालको घरमा जुवातास खेलिरहेको भन्ने सूचनाका आधारमा खटिएको प्रहरी टोलीले छापा मारेर १९ वर्षीय राधे कामतसहित १२ जनालाई नियन्त्रणमा लिएको हो।

प्रहरीले घटनास्थलबाट नगद २ लाख ५७ हजार ४ सय रुपैयाँ, २२ बुक तास र १४ थान मोबाइल फोन बरामद गरेको जनाएको छ।

जुवाखेल तथा अवैध गतिविधिविरुद्ध प्रहरीले निगरानी र कारबाहीलाई निरन्तरता दिएको बताउँदै यस घटनासम्बन्धी थप अनुसन्धान भइरहेको जनाएको छ।

हाल पक्राउ परेका व्यक्तिहरूमाथि प्रचलित कानुनअनुसार आवश्यक प्रक्रिया अगाडि बढाइएको प्रहरीले जनाएको छ।